Heb 12 | NdeIBE | STEP | Ngakho-ke, njengoba sihanqwe lixuku elikhulu kangaka labofakazi, kasikulahleni konke okusivimbelayo kanye lesono esihilela lula, njalo kasigijimeni ngokubekezela kulo umjaho ophawulelwe thina.

Hebrews 12

UNkulunkulu uyawalaya amadodana akhe

1 Ngakho-ke, njengoba sihanqwe lixuku elikhulu kangaka labofakazi, kasikulahleni konke okusivimbelayo kanye lesono esihilela lula, njalo kasigijimeni ngokubekezela kulo umjaho ophawulelwe thina. 2 Kasikhangeliseni amehlo ethu kuJesu, uMqalisi loMphelelisi wokukholwa kwethu, okwathi ngentokozo eyayibekwe phambi kwakhe wabekezelela isiphambano, engananzi ihlazo laso, wahlala kwesokudla phansi kwesihlalo sobukhosi sikaNkulunkulu.

3 Cabangani ngaye owabekezelela ukuphikiswa okungaka ngabantu abayizoni, ukuze lingabi buthakathaka lilahle ithemba.

4 Ekulweni kwenu lesono, kalimelananga laso okufika ebangeni lokuchitha igazi lenu. 5 Njalo selilikhohliwe lelizwi lokulikhuthaza elikhuluma kini njengamadodana elithi: “Ndodana yami, ungeyisi ukulaya kweNkosi. Njalo ungalahli ithemba lapho ikukhuza,

6 ngoba iNkosi ilaya labo ebathandayo, ijezise wonke emamukela njengendodana.”

7 Bekezelelani ukuhlupheka njengokulaywa; uNkulunkulu uliphatha njengamadodana akhe. Ngoba yiyiphi indodana engalaywa nguyise na?

8 Uma lingalaywa (umuntu wonke uyalaywa), liyabe lingabantwana abazalwa ngokungemthetho abangasiwo amadodana uqobo. 9 Phezu kwalokho, sonke sake saba labobaba abasilayayo njalo sabahlonipha ngenxa yalokho. Pho kufanele sizehlise kakhulu okungakanani kuBaba wemimoya yethu njalo siphile! 10 Obaba basilaya okwesikhatshana ngababebona kukuhle; kodwa uNkulunkulu usilaya ukuba sisizakale, ukuba sihlanganyele ebungcweleni bakhe. 11 Akukho kulaywa okukhanya kukuhle ngalesosikhathi, kodwa kubuhlungu. Kodwa muva, kuletha isivuno sokulunga lokuthula kulabo abafundiswa yikho.

12 Ngakho-ke qinisani izingalo zenu ezibuthakathaka lamadolo enu axegayo. 13 “Yenzelani izinyawo zenu izindlela ezibekekileyo,” ukuze abaqhulayo bangagogeki, kodwa basiliswe.

Isixwayiso ngokwala uNkulunkulu

14 Zamani kakhulu ukuhlalisana ngokuthula labantu bonke lokuba ngcwele; kungekho bungcwele kakho ozayibona iNkosi. 15 Bonani ukuthi kakho oswela umusa kaNkulunkulu kanye lokuthi akulampande ebabayo ekhulayo ukuba idale uhlupho ingcolise abanengi.

16 Bonani ukuthi kakho oyisifebe, loba ongakhonzi uNkulunkulu njengo-Esawu okwathi ngenxa yokudla kunye wathengisa amalungelo elifa lakhe okuba yindodana endala. 17 Muva, njengoba lisazi, lapho esefuna ukuzuza isibusiso lesi waliwa. Wayengeke enze kube lokuguquka kwengqondo, lanxa wafuna isibusiso leso ngezinyembezi.

18 Kalizanga entabeni engathintwa njalo ebhebha umlilo; ebumnyameni lasekufiphaleni lesiphepho; 19 ekukhaleni kwecilongo loba ilizwi elinjalo elikhulumayo, okwenza labo abalizwayo bacela ukuba kungabi lelizwi elikhulunywa kubo futhi, 20 ngoba babengeke bakumele ukulaywa okwathi: “Lenyamazana ingathinta intaba, kumele itshaywe ngamatshe.”

21 Okwabonwayo kwakusesabeka kakhulu uMosi waze wathi, “Ngiyathuthumela ngenxa yokwesaba.”

22 Kodwa lina lize eNtabeni iZiyoni, iJerusalema lasezulwini, umuzi kaNkulunkulu ophilayo. Lize kuzinkulungwane lezinkulungwane zezingilosi ezihlangane ngentokozo, 23 ebandleni lezibulo, ezimabizo azo alotshiwe ezulwini. Lize kuNkulunkulu, umahluleli wabantu bonke, emimoyeni yabantu abalungileyo abaphelelisiweyo, 24 kuJesu ummeli wesivumelwano esitsha, lasegazini elicheliweyo elikhuluma ilizwi elihle kulegazi lika-Abela.

25 Bonani ukuthi kalimenqabeli lowo okhulumayo. Uma bengaphephanga lapho benqabela lowo owabaxwayisa emhlabeni, koba kuncane kangakanani kithi, uma sidela lowo osixwayisa ezulwini na? 26 Ngalesosikhathi ilizwi lakhe lanyikinyisa umhlaba, kodwa khathesi usethembisile wathi: “Ngizaphinda njalo futhi nginyikinyise, hatshi umhlaba kuphela, kodwa lamazulu futhi.” 27 Amazwi la “njalo futhi” atsho ukususwa kwalokho okunganyikinyiswa – okuyikuthi izinto ezadalwayo – ukuze kuthi lokho okungeke kunyikinyiswe kusale.

28 Ngakho-ke, njengoba sisamukela umbuso ongeke unyikinyiswe, kasibongeni njalo sikhonze uNkulunkulu ngokufaneleyo ngenhlonipho langokwesaba, 29 ngoba uNkulunkulu wethu ungumlilo oqothulayo.